BUTUAN CITY – Posibleng karong Dominggo na, Marso 7, sugdan sa Department of Health kon DOH-Caraga ang vaccination roll out human nahidangat kaganinang alas-11:10 sa sayong udto ang 9,000- nga doses sa COVID-19 Sinovac vaccines. Gisulod ang maong mga bakuna sa 15 ka mga kahon kansa gideretso ngadto sa cold storage sa DOH warehouse.
Sa eksklusibong pakighinabi sa Bombo Radyo Butuan, gipadayag ni DOH-Caraga regional director Dr. Jose Llacuna Jr., nga gikatakdang i-deliver na nila ang maong mga bakuna ugmang adlawa ilabina sa Butuan Medical Center, Butuan Doctors Hospital, ug MJ Santos Hospital. Sa Agusan del Sur, i-deliver kini ngadto sa San Francisco Doctors’ Hospital ug DO Plaza Memorial Hospital samtang sa Surigao provinces, didto kini i-deliver sa Caraga Regional Hospital, Adela Serra Ty Memorial Medical Center, Bislig District Hospital ug Andres Soriano Memorial Hospital Cooperative.
Itupok matud pa ang maong mga bakuna ngadto sa 4,500 ka mga healthcare frontliners sa nasangpit nga mga level 1 ug level 2 health facilities.
