BUTUAN CITY – Mi-abot sa P10,974,000.00 nga kantidad sa financial assistance ang natunol sa Department of Social Welfare and Development kon DSWD ngadto sa 3,658 ka mga pamilya sa Tandag City, Surigao del Sur nga biktima sa paghapak sa bagyong Auring.
Ang maong kantidad, gi-apod sa tag-3 mil pesos matag-pamilya nga gipa-agi sa Assistance to Individuals in Crisis Situation kon AICS program ilalom sa Crisis Intervention Unit, kansa gi-abagan sa Local Social Welfare and Development Office (LSWDO) ug sa Social Welfare and Assistant Desk kon SWAD Team sa maong lalawigan.
Una nang gitaho kagahapon ni DSWD Secretary Rolando Joselito Bautista ngadto kang Pangulong Rodrigo Duterte atol sa ilang situation briefing nga mukabat na sa 3,500 ka mga family food packs ang ilang napang-apod apod sa paghapak sa bagyong Auring partikular na sa lungsod sa Marihatag ug sa Tandag City parehong sakop sa Surigao del Sur.
Kini nga mga pagkaon naka-preposition na kondiin ilang gi-tap ang mga warehouses.
Wala pa’y labot niini ang 8-mil ka mga family food packs nga anaa sa ilang regional field office sa Caraga ug 7-mil nga naka-abot kagahapong adlawa sa Tandag City.
Duna usab sila’y balor 22.09-milyunes pesos nga standby fund ug stockpiles kon mga food ug non-food items.
