BUTUAN CITY – Natumba ang usa ka de pasaheroang bus sa Bachelor Express Company human na out of control tungod sa danlog nga dalan diha sa Brgy De Oro, ning syudad sa Butuan alas-una kagahapon sa hapon.
Sumala sa mga nakasaksi hinay lamang matod pa ang dagan sa King Long bus nga gikan sa Tandag City ug padulong unta dinhi sa syudad apan tungod sa kadanlog sa dalan nga mugna sa kusog nga ulan hinungdan sa maong aksidente.
Luwas ra hinuon ang tanang sakay niini gawas sa usa ka pasaherong nagpahatod sa ospital human naglisod sa pagginhawa human sa insidente.
Sumala ni Martin Lumawag residente sa Purok-5 Barangay Canayugan, Bayugan City nabunal matod pa siya sulod sa bus atol sa maong insidente nga miresulta sa pagpanakit sa iyang gusok ug lisod sa pagginhawa apan gilayon usab hinuon siyang gitabangan sa mga mirespunde.
Madumduman adtong Sabado duha ka managlahing aksidente usab ang natigayon sa Prosperidad, Agusan del Sur nga gikalambigitan ang usa ka dump truck ug pick up ingon man usa ka depasaheroan gihapong bus sa Bachelor Express via Davao City diin gidaro niini ang usa ka motorsicad nga miresulta sa kamatayon sa driver.
