BUTUAN CITY – Gisugdan na ning alas-sais lang sa buntag ang upat ka adlaw nga special concern lockdown sa Cabadbaran City sa lalawigan sa Agusan del Norte nga mulungtad sa Pebrero 3 sa alas-singko sa hapon kondiin 15 ka mga barangay ang masulod nini.
Sigon ni PMajor Renel Serrano, station commander sa Cabadbaran City Police Station, walo ka mga checkpoints ang ilang gimontar ka-uban ang ilang counterpart sa 65th ug 29th Infantry Battalion, Philippine Army aron lang masigurong wala’y makasulod nga mga dili taga-Cabadbaran ilabina karong pista sa ilang patron nga si Nuestra Señora de Candelaria sa Pebrero 2.
Sa eksklusibong pakighinabi sa Bombo Radyo Butuan, gipadayag ni Major Serrano nga ka-abag nila ang mga personahe sa CIty Disaster Risk Reduction and Management Office kon CDRRMO, Bureau of Fire Protection, ug mga volunteers nga maoy maghatud sa mga tawong mu-agi lang sa ilang siyudad padulong ngadto sa border.
Dugang pa ni Serrano, makasulod-gawas gihapon sa maong mga adlaw ang mga taga-Cabadbaran nga nagtrabaho gawas sa siyudad ug kadtong dili taga-ila apan duna’y trabaho o kaha negosyo sa ilang siyudad.
Gipahibalo usab sa opisyal ang mga residente sa kasikbit nga mga lungsod nga na-andan nang anha magmerkado sa Cabadbaran, nga dili sila pasudlon sa maong mga adlaw rason nga mapugos gyod sila pagpalit sa merkado sa ilang lungsod nga gipuy-an.
