BUTUAN CITY – Dead on the spot ang area supervisor sa National Food Authority (NFA) nga nadestino sa Las Nieves, Agusan del Norte human gipusil sa wala pa mailhing riding-in-tandem suspects.
Sa eksklusibong pakighinabi sa Bombo Radyo Butuan, gi-ila ni PCapt. Jucie Awayan, hepe sa Las Nieves Municipal Police Station ang biktimang si Dionesio Lasquña, 50-anyos residente sa Brgy 4, Buenavista, Agusan del Norte.
Sa ilang inisyal nga imbestigasyon, hapit na mag alas-8 ning mi-aging gabii dihang nagkaon og balut ang biktima ug samtang nagtalikod sa kalsada, gipusil kini sa ulo hinungdan sa hinanali niining kamatayon.
Sumala pa ni Captain Awayan, sa wala pa mahitabo ang insidente duna na kini gidala-dalang problema kabahin sa iyang inahan ug mga igsoon kondiin gihusay sila sa ilang barangay tungod pagsupak sa mga igsoon niini sa gitarok niyang balay sa yutang gipanag-iyahan sa ilang ginikanan rason nga gipursige siya sa paagpahawa.
Tungod niini, wala’y laing nakitang motibo ang kapulisan sa pagpatay sa biktima kondili ang bangi tali nila sa iyang mga igsoon.
Narekober sa crime scene ang kalibre .45 nga pistola.
