BUTUAN CiTY – Wala matago sa lokal nga kagamhanan ang mitumaw nga mga isyung apil matukd pa ang mga tawong namatay sa laing sakit, ang gideklarang COVID-19 positive.
Sa eksklusibong intereview sa Bombo Radyo Butuan, gibutyag ni Butuan City government spokesperson Michiko de Jesus, ang natalang patay ning siyudad tungod sa COVID-19 as of kagahapong adlawa, Disyembre 7, mi-abot sa 57 sukad nagsugod ang pandemya.
Base kini sa assessment ug evaluation nga gihimo sa mga personahe sa City Health Office ug sa Department of Health kon DOH-Caraga sa mga nagpositibo subay na sa gi-agi-ang proseso bisan og duna’y mga comorbidities sa pipila sa maong ihap.
Sigon sa opisyal, bisan og naka-abot sa ilang buhatan ingon man sa kasayuran sa DOH-Caraga ang maong isyu, apan gidepensahan niini nga ang tanang namatay ning siyudad, nagpositibo gyod sa COVID-19 base na sa gipa-ilawman nilang proseso ilabina sa swab test.
Gipa-abot sa iyang kasayuran nga duna’y empleyado sa usa sa mga barangay ning siyudad nga dead-on-arrival na sa usa ka pribadong ospital human gi-atake apan gihangyo matud pa sa doktor nga ipadeklara na lang nga COVID-19 positive aron wala na’y bayran, apan wala misugot ang kabanay og mas gipili nga bayran ang bill rason nga kini nahaya.
Gipadayag ni de Jesus nga posible kining mahitabo ug angayan lang nga imbestigahan aron masuta ang mga practices nga ginahimo sa mga ospital ning siyudad.
Mamahimo matud pa kining isang-at ngadto sa Committee on Health sa Sangguniang Panlungsod ubos kang committee chairman Konsehal Cherry Mae Busa aron masusi ang maong modus.
