BUTUAN CITY – Gikan sa 33 ka mga kaso sa COVID-19 nga nadugang kagahapon, nakun- huran lang kini og duha ning adlawa human nakatala og bag-ong 31 ka mga kaso ang rehiyon samtang duha usab ang namatay.
Sa virtual announcement sa Department of Health kon DOH-Caraga, usa ka kaso niini natala sa lungsod sa Las Nieves, Agusan del Norte; siyam ka mga kaso sa Agusan del Sur nga natala sa lungsod sa San Francisco-6 ug tag-usa na sa mga lungsod sa Bunawan, Prosperidad ug Sibagat.
Nakatala usab og tag-usa ka kaso ang mga lungsod sa Bacuag, Surigao del Norte ug Carrascal, Surigao del Sur samtang upat sa Surigao City nga nabahin sa Brgy. Luna-2 ug tag-usab usab sa Brgy. Canlanipa ug San Juan.
Duna usa’y 7 ka mga kaso sa Bislig City sakop sa Surigao del Sur nga natala sa Brgy. Manggy 5, ug tag-usa sa Brgy. San Roque ug Tabon samtang walo ka mga kaso usab ang natala ning siyudad sa Butuan kondiin duna’y tag-usa ka kaso sa Brgy. Ambago; Baan Km. 3; Golden Ribbon; Libertad; Maibu, Sikatuna, Tandang Sora ug Villa Kananga.
Sa bag-ong 31 ka mga kaso, 17 niini kon 55-porsiento ang mga babaye samtang 14 ka mga lalaki kon 45-porsiento ug 65-porsiento sa kinatibuk-ang ihap ang anaa sa edad nga 31 hangtud 60-anyos kondiin 15 kanila ang mga wala’y simtomas kon asymptomatic, 14 ang duna’y mild symptoms samtang duha ang grabe.
Apil sa namatay ang usa ka 55-anyos nga lalaking taga-Surigao City nga wala’y comorbidity, balik-balik ang hilanat, nawad-an og panglasa, lisod nga pagginhawa ug lapoy ang lawas niadtong Septembre 21 rason nga gi-admit pagka-Oktubre 2 apan namatay sa susamang adlaw.
Samtang ang laing usa mao ang usa ka 66-anyos nga lalaking taga-Bislig City kinsa diabetic ug duna’y sakit sa baga. Nawad-an siya og panglasa, gi-ubo og naglisod pagginhawa niadtong Septembre 22, gi-admit pagka-Oktubre 1 apan namatay paglabay sa upat ka mga adlaw tungod sa komplikasyon.
