BUTUAN CITY – Nakatala na usab og 23 ka mga bag-ong kumpirmadong kaso sa COVID-19 ang Caraga Region kondiin 12 niini kon 52-porsento ang mga babaye samtang 11 usab kon 48-porsiento ang mga lalaki ug 70-porsiento kanila ang anaa sa edad nga 21 hangtud 50-anyos.
Ang mga bag-ong kaso nabahin sa Agusan del Norte nga nakatala og 1 didto sa lungsod sa Buenavista samtang 2 sa Agusan del Sur nga nabahin sa mga lungsod Bunawan ug Veruela ug 20 niini pulos taga-Butuan nga na-apod sa Brgy. Ambado, Diego Silang, Tiniwisan ug Villa Kananga nga parehong mitala og tag-duha samtang tag-usa na usab sa Brgy. Dagoho, Datu Silongan, Golden Ribbon, JP Rizal, Libertad, Limaha, Maon, Maug, Obrero, Pagatpatan, San Vicente ug Tagabaca.
Sa maong ihap usab, tag-usa niini ang locally stranded individual kon LSI, wala’y travel history sa lugar nga duna’y natalang local transmission samtang 21 ang mga local transmission cases o kaha na-expose ngadto sa COVID-[19 case.
Tag-onse usab kanila ang wala’y simtomas kon asymptomtic ug duna’y mild condition samtang usa ang duna’y grabeng simtomas kondiin pareho silang gipang-quarantine, gi-monitor ug gi-atiman.
Nadugangan usab og duha ka patay ang rehiyon ng gilangkuban sa usa ka 67-anyos nga babayeng taga-Butuan kinsa wala’y comorbidity apan gi-admit sa ospital niadtng Septembre 20 tungod sa pagkaluya sa lawas ug gihilantan kondiin gipa-ilalom sikya sa intensive care management hangtud nga nakomplikado ang iyang kondisyon ug namatay ning mi-aging adlaw, Septembre 30.
Samtang ang ikaduhang namatay mao ang 79-anyos nga lalaking taga-Butuan usab nga gihilantan, gi-ubo ug maglisod pagginhawa niadtong Septembre 8, gi-admit pagka-Septembre 15 apan tungod sa mga komplikasyon namatay sa Septembre 21.
