BUTUAN CITY – Subling nagpasidaan ang lokal nga paggamhanan sa Butuan City ngadto sa mga establishemento ug mga indibidwal nga masakpang wala nagtuman ug misunod sa mga health protocols nga adunay silot ug multa ipahamtang kanila.
Gipadayag kini ni Michiko De Jesus, tigpamaba sa Butuan City government sa pakighinabi sa Bombo Radyo Butuan, subay pa gihapon sa padayong pagsaka sa ihap sa mga nataptan sa dakbayan labi na ang mga local transmission cases sa COVID-19.
Sigon sa opisyal, ubay-ubay na nga mga inbidwal ug establishemento ang nasilotan. Sigon niini ang ginagmay nga butang pinaagi sa pagsunod sa mga simpleng tamdanan adunay dakong matampo diha sa pagpugong sa pagkaylap sa sakit.
Busa angayan nga kanunay dumdumon ug himuon ang atong responsibilidad ug mokuoparar diha sa komunidad aron malikayan ang posibleng pagkaylap pa sa sakit.
Madumdumang pabilin gihapong gipilalom sa Modified General Community Quarantine (MGCQ) ang Butuan City nga nagsugod kagahapong adlawa Oktubre 2 hantod 31 kon insaktong usa ka buwan.
Ang maong klasipikasyon nahisubay gihapon sa rekomendasyon sa Inter-Agency Task Force Screening and Validation Committee ubos sa Resolution Number 75-A, Series of 2020.
Ubos niini pabilin gihapon nga ipatuman ang mga quarantine passes ug color coding nga daan nang gipatuman ning siyudad.
Subsob usab ang himuong monitoring sa kapulisan batuk sa mga malapason sa mga health protocols aron mapugngan ang padayong pagkaylap sa makamatay nga coronavirus kondiin multahan gihapon og tag-usa ka libo ka pesos ang matag-indibidwal nga madakpang mulapas niini.
Samtang, gihatagan usab og gibug-aton sa tigpamaba ang dakong tabang unya nga matunol sa mga dugang contact tracers nga gikan sa Department of Interior and Local Government (DILG) diin muabot sa kapin libo ang dugang nga i-augment.
