BUTUAN CITY – Giklaro ni Congressman Lawrence Lemuel Fortun ning siyudad sa Butuan ug unang distrito sa Agusan del Norte ang gihimong botohay sa mga membro sa House of Representatives kagahapon human nag-resign pagka-house speaker si Congressman Alan Peter Cayetano.
Sa eksklusibong pakighinabi sa Bombo Radyo Butuan, gipadayag ni Congressman Fortun nga ang pagka-house speaker nagkinahanglan og mandatu gikan sa mga membro sa House of Representatives bisan og duna na’y mga sabot-sabot ning mi-aging tuig kalabot sa term-sharing.
Sigon ni Congreesman Fortun, ang panagsabot tali nila Congressman Alan Peter Cayetano ug Lord Alan Velasco, natigayon atol sa ordinaryo ug normal nga sirkumstansya sa atong nasud kondiin wala pa ang COVID-19 pandemic.
Dihang mi-abot ang wala lauming pandemya, nabutang sa krisis ang nasud kondiin gikinahanglan nga ang pagserbisyo sa katawhan, wala’y disturbo ug wala’y samok ilabina sa mga prayuridad nga aksyunan sama sa paggahin og pundo alang sa nasud sunod tuig.
Gipasabot ni Fortun, ang nasinatiang pandemya ang rason sa mitumaw karong problema sa speakership sa kamara nga maoy nahimong babag alang sa sayon ra unta nga pagtugyan ni Cayetano sa liderato sa kamara ngadto kang Velasco.
Ang nahitAbo matud pa kagahapon, gisaysay sa speaker ang mga panghitabo atol sa panagkita nila ni Pangulong Duterte ug Velasco kondiin duna’y suhestyon si Pangulong Rodrigo Duterte nga isibog una sa Disyembre ang term-sharing tungod sa pagtuki pa sa budget sa tuig 2021.
Apan tungod sa pagpamugos sa kampo ni Velasco nga ipatuman ang term-sharing, dinhi na gisulti ni Cayetano ang iyang pag-resign na sa pwesto dungan sa pagpadayag sa iyang ka-andam paghimo niini aron dili lang madisturbo ang pagpapasar sa budget karong Oktubre 14 adiser kinio mag-recess.
