BUTUAN CITY – Misaka na karon sa 675 ang kumpirmadong COVID-19 positives sa Caraga Region human nadugangan og lima ka mga bag-ong kaso kondiin 18 gihapon ang natalang patay.
Sigon ni Dr. Gerna Manatad, OIC assistant regional director sa Department of Health kon DOH-Caraga, 411 sa maong ihap ang hingpit nang nakarekober clinically rason nga gipang-discharge na samtang 442 ang mga asymptomatic kon wala’y gipakitang simtomas sa sakit ug 246 ang mga aktibong kaso.
Hinuon, posibleng madugangan pa kini karong adlawa tungod kay duna pa sila’y gipa-abot nga resulta gikan sa 152 ka mga specimen nga gisusi apil na niini ang 45 nga anaa sa Butuan Medical Center ug Southern Philippines Medical Center kon SPMC.
Giklaro usab ni Dr. Manatad nga misaka ang suspect cases sa COVID-19 nga anaa sa nagkada-iyang isolation facilities ning rehiyon.
Sa mga siyudad ning rehiyon, ang dakbayan sa Butuan maoy duna’y pinakadaghang kaso nga mi-abot na karon sa 340 ka mga kaso, nga gisundan sa mga siyudad sa Bislig lalawigan sa Surigao del Sur, Bayugan sa Agusan del Sur, Surigao City sa Surigao del Norte ug Cabadbaran City sa Agusan del Norte.
