BUTUAN CITY – Nagpadayon ang rescue operation sa Japanese Coast Guard ngadto sa 38 ka mga tripolanteng Pinoy uban sa langyaw nilang mga ka-ubanan human mitikla-ob ang ilang gisakyang Panamanian registered cargo ship sa kadagatan sa Japan.
Sa eksklusibong pakighinabi sa Bombo Radyo Butuan, gipadayag sa Butuanon nga si Bombo Japan correspondent Reuben Cabaluna Jr., nga tulo ka ka mga barko sa Japanese coast guard ang milambigit sa search ang rescue operations uban sa lima ka mga eroplano ug duha ka mga divers kondiin ang pagpadayon sa operasyon magdepende lang tungod sa daut nila karon nga panahon nga hatud sa bagyong Maysak ug sa mu-abutay pa nga bagyong Haishen.
Ang bagyong Maysak maoy hinungdan sa pagtikla-ob sa barkong duna’y kargang duha ka mga Australians, 39 ka mga Pinoy apil na ang kapitan ug duha ka mga New Zealanders kansa mibiya sa New Zealand niadtong Agusto 14 ug gila-umang mu-abot unta sa China sunod Biernes.
Apan dihang anaa kini sa kadagatan sa Amami-Oshima Island sa Kagoshima Prefecture, southwestern Japan, nagpadala na kini og distress call niadtong Miyerkules sa ala-1:45 sa kaadlawon apan wala na’y na-abtan pang barko ang Japanese Coast Guard hangtud nga napalgan sa guard uban sa Maritime Self-Defense Force, nga duna’y surveillance aircraft, ang usa ka survivornga sakay sa lifeboat samtang suot ang life vest ug nagpa-anod lang sa dagat.
Sa pagkakaron, nakig-alayon na ang konsulada sa Pilipinas didto sa Japan ngadto sa mga otoridad alang sa pag-turn over na sa naluwas nga 45-anyos nga chief officer sa barko nga si Eduardo Sareno.
