BUTUAN CITY – Gikumpirma ni PMajor Renel Serrano, information officer sa Police Regional Office (PRO) 13 nga ang gidagit nga pulis sa mga rebeldeng New People’s Army (NPA) ning mi-aging buwan, ang napalgang patay’ng lawas kaganina sa bukirang bahin sa Sitio Napo, Brgy. Matin-ao, sa lungsod sa Mainit, Surigao del Norte.
Kini human na-ila sa mismo niining classmate nga mao kini ang biktimang si Police Staff Sergeant (PSSg) Restie Dandan, 42 anyos, minyo og residente sa Purok 5-A Brgy. San Isidro sa lungsod sa Sison sa maong lalawigan ug hepe sa Intelligence Section sa Sison Municipal Police Station.
Sa eksklusibong pakighinabi sa Bombo Radyo Butuan, gipadayag ni Major Serrano nga nagpadayon pa ang imbestigasyon sa mga sakop sa Mainit Municipal Police Station aron masayran ang motibo sa pagpatay sa biktima.
Madumdumang gidagit ang biktima sa mga rebeldeng New People’s Army (NPA) niadtong Hulyo 30 sa Purok 1, Brgy. San Isidro, sa lungsod sa Sison dihang padulong na unta kini sa iyang trabaho.
