BUTUAN CITY – Gibana-banang mukabat sa 300-mil pesos ang inisyal nga assessment sa damyos nga hatud sa sunog nga milamoy sa siyam ka panimalay kaganinang alas-2:32 sa kaadlawon sa may Purok 7, CCF, Brgy. Doongan ning siyudad sa Butuan.
Ang maong mga panimalay gipang-iyahan nila Jennifer Cali, Noelito Atienza, Ireneo Cabatania, Nicanor Saga, Corazon Urbia, Larra Christian, Mermenvil Espina ingon man nila Sammy ug Tito Escol.
Migawas sa inisyal nga imbestigasyon sa Bureau of Fire Protection kon BFP-Butuan nga nagsugod matud pa ang sunog dihang naputol ang cable wire sa Agusan del Norte Electric Cooperative, Inc kon ANECO ug didto mitugpa sa atop sa panimalay ni Ireneo Cabatania hangtud nga daling mikaylap sa kabalayan sa iyang mga silingan.
Nadeklara ang fire out pasado alas-kwatro na sa kaadlawon.
