BUTUAN CITY – Misaka na karon sa 325 ang kinatibuk-ang kaso sa COVID-19 dinhi sa Caraga Region human nadugangan og 19 ka mga bag-ong kaso.
Kini base na sa pagkumpirma ni Dr. Jose Llacuna Jr., regional director sa Department of Health-Caraga human nadawat ang 134 ka mga RT-PCR tests gikan sa Southern Philippines Medical Center ug Northern Mindanao TB Reference Center sa Davao City kondiin 115 niini ang negatibo.
Sa bag-ong natalang kaso, 11 niini ang mga babaye samtang 8 ang mga lalaki nga anaa sa edad nga 20 ngadto sa 30-anyos ug sa maong ihap ihap, 12 ang mga locally stranded individuals kon SLIs, usa ang Returning Overseas Filipino, tulo ang duna’y close contact sa mga kanhi nagpositibo sa maong sakit kon natakdan; duha ang mga non-medical front liners smtang usa ang duna’y travel history ning siyudad nga taga-Jabonga, Agusan del Norte.
Sa maong gidaghanon, upat niini ang taga-Agusan del Norte nga gilangkuban sa duha nga taga-Nasipit ug tag-usa sa mga lungsod sa Jabonga ug Santiago; tulo ang taga-Taganaan, Surigao del Norte; upat sa Surigao del Sur nga taga-Cantilan, Crrascal, Madrid ug Tago; upat ang taga-Butuan; duha sa Bayugan City; usa sa Surigao City ug usa sa Tandag City.
Upat sa 19 ang ang duna’y mild symptoms samtang asymptomatic ang uban ug anaa na sa nagkada-iyang quarantine facilities ning rehiyon.
Giklaro usab sa opisyal nga nakatala na ng rehiyon og cumulative local transmission nga mi-abot na sa 49 kondiin 14 kanila ang na-discharge na , 31 ang aktibo pa ug usa ang namatay.
