BUTUAN CITY – Ipailalom karung adlawa sa rapid testing ang halos usa ka gatus ka empleyado sa Butuan City Water District kon BCWD lakip na ang ilang General Manager human napatay tungod sa Covid-19 ang amahan sa ilang usa ka empleyado.
Sa pakighinabi ning sibyahan kang BCWD General Manager Anselmo Sang Tian, gibutyag niini nga kagahapong adlawa miadtu ang taga City Health sa ilang buhatan alang sa contact tracing diin ang mga nakahalubilo sa empleyado, ipailalom sa rapid test dayung panghinaot nga wala untay magpositibo niini.
Pasabot pa ni Sang Tian nga sa nakalabay nga semana, wala na mitrabaho pa ang ilang empleyado tungod kay kini na ang nagbantay sa iyang amahan sa ospital. Sa nakalabay nga semana usab gisugdan nila ang pag-disinfect sa opisina sa matag alas 5:00 sa hapon.
Apan pagklaro sa opisyal nga business as usual lang gihapon sila dungan sa hugot nga pagsunod sa health measures diin gipaneguro nga walay kontak ang empleyado ug ang kunsumante nga dunay transaksiyon sa opisina.
Samtang posibleng karung adlawa usab muabot ang swab test nga gikuha gikan sa nasangpit nga empleyado.
Gipa-ambit usab ni Sang Tian ang kasinatian nilang empleyado sa BCWD diin gikahadlokan na sila sa ubang kunsumante. Mas migamay matud pa ang magtransak sa ilang opisina, bisan sa gihimo nga service connection mahadlok na usab mohawid bisan sa papel ang mga kunsumador samtang ang mga bill, didto lang ibutang sa ipa-singit sa koral.
Tungod niini, mas migamay ang collection karun sa BCWD. Mihangyu na lang ang opisyal sa tanang Butuanons nga sabton ang ilang kahimtang og dili mahadlok nga makig-transak sa opisina tungod kay hugot man nilang gituman ang mga healtjh protocols aron makalikay sa virus. Pwede usab sila magbayad 5 ka accredited collection sa BCWD.
