BUTUAN CITY – Malampuson ang gihimong drug buy bust operation pasado alas-2:00 kagahapon sa hapon sa may Purok-18, Barangay Obrero ning siyudad sa Butuan diin nasikop ang kanhi barangay tanod.
Gihimo ang operasyon sa mga ginsakpan sa Philippine Drug Enforcement Agency kon PDEA-Caraga didto sa panimalay sa suspetsadong si Carlos Gaking, 60-anyos kinsa nakuhaan pa og usa ka sachet sa gitu-uhang shabu, lakip na ang usa ka libo ka pesos nga buy bust money, mga lighter ug cellphone.
Sa eksklusibong pakighinabi sa Bombo Radyo Butuan ngadto sa suspek, hugot niining gipanghimakak nga iya ang nakuhang item dungan sa pagpamugos nga nakurat na lamang siya nga dunay mga otoridad sa panimalay sa iyang ginikanan dihang siya natulog.
Samtang sa pakighinabi usab kang Barangay Obrero Kapitan Dindo Rivero, giklaro niining anaa sa listahan sa mga misurender ang nasangpit nga suspek.
Niadtong nakalabay nga tuig kini misulod sa pagka-barangay tanod apan iyang gitang-tang niadto lamang bulan sa Enero.
