BUTUAN CITY – Mamahimo nang makapamaligya ug makapalit og ilimnong makahubog ang katawhan ning siyudad sa Butuan apan kini diha lamang sa mga barangay nga anaa na sa general community quarantine kon GCQ og dili niadtong anaa pa sa enhanced community quarantine kon ECQ o kaha modified ECQ.
Kini ang giklaro ni PLt. Abel Bulawan – tigpamaba sa Butuan City Police Office dungan sa pagklaro nga base na usab kini sa executive order nga gipagawas sa lokal nga kagamhanan ning siyudad.
Sa eksklusibong pakighinabi sa Bombo Radyo Butuan, gipadayag ni Lt. Bulawan nga bisan og gitangtang na ang liqour ban sa mga GCQ areas, apan wala’y gitugutang mag-inom inom diha sa pampublikong lugar gawas lang sulod sa imong pinuy-anan samtang bawal usab ang mangimbitar aron mag-uban og tagay sulod sa balay.
Samtang subay usab sa kapistahan ning siyudad karong adlawa, gipadayag sa opisyal nga kanunay silang naka-alerto rason nga kanunay ang ilang pagpatrolya ug monitoring sa tibuok siyudad.
Kanunay usab ang ilang pagbantay sa mga tawong nanggawas nga wala makadala sa ilang home quarantine pass tungod kay istrikto gihapong gipatuman ang color-coding niini.
