BUTUAN CITY – Hugot usab nga gi-monitor sa Adela Serra Ty Memorial Medical Center ang usa ka 37-anyos nga lalaki tungod sa iyang loose bowl movement kon LBM kinsa hubakon pa ug ug duna’y history sa PTB.
Sa situational report #46 nga gipagawas usab sa maong ospital, nakalatid nga giplastar ang pasyente sa isolation ward sa maong ospital kinsa nakuhaan na og rapid anti-body test apan nagnegatibo na.
Gikuhaan na usab siya ug swab sample alang sa real-time reverse transcription polymerase chain reaction kon RT-PCR test samtang padayong gihatagan og intensive medical ug nursing care.
Gihulatan na lang nila karon ang confirmatory result sa maong pasyente nga giproseso pa sa sub-national laboratory sa Research Institute for Tropical Medicine kon RITM sa Southern Philippines Medical Center nga nakabase sa Davao City.
Alayon niini gi-awhag sa kadumalahan sa maong ospital ang publiko nga ipadayon ang pagsunod sa tanang precautionary measures nga gitambag sa Department of Health kon DOH apil na ang tanang provincial ordinances ingon man advisories gikan sa mga local government units.
