-- ADVERTISEMENT --
BUTUAN CITY – Gihatagan og desenting lubong ang namatay na kagahapon sa alas-3:47 sa hapon nga usa ka 30-anyos nga babaye kinsa gi-admit sa Adela Serra Ty Memorial Medical Center kon ASTMMC tungod sa gihambin niining mga simtomas sa makamatay nga coronavirus.
Base sa situational report #46 nga gipagawas sa maong ospital, nagnegatibo sa COVID-19 test ang pasyenteng gi-ila lang nga si ASTMMC SC14 kinsa gi-admit niadtong Mayo 13 tungod sa lisod niining pagginhawa, hilanat og ubo kinsa duna usa’y history sa systematic lupus erythematosus.
Namatay siya pila ka oras ang milabay human migawas ang resulta sa iyang COVID-19 test.
Namatay matud pa kini nga duna’y acute respiratory failure, antecedent cause sa community aquired pneumonia.
Alayon niini, nakig-alayon matud pa ang kadumalahan sa maong ospital ngadto sa lokal nga kagamhanan sa Tandag City sa Surigao del Sur ug sa gipuy-an sa pasyente alang sa saktong pagdumala sa iyang patay’ng lawas base na sa Memorandum Circular No. 2020-063 kon mas nailang ‘Interim Guidelines on the Management and Human Remains for Patients Under Investigation and Confirmed COVID-19’.
