BUTUAN CITY – Gila-umang mu-abot na sunod semana dinhi sa Butuan ang mga kadagkuan sa Department of Health-Central Office uban sa World Health Organization kon WHO-Philippines ug Research Institute for Tropical Medicine kon RITM aron bisitahon ang Butuan Medical Center sa ingon ma-assess ang ilang aplikasyon aron mahimong COVID-19 testing center dinhi sa siyudad.
Sa eksklusibong pakighinabi sa Bombo Radyo Butuan, gibutyag ni Dr. Jose Llacuna Jr., regional director sa Department of Health kon DOH-Caraga nga kini human nga gihimo na sa local nga kagahmanan ning siyudad ang unang lakang sa ilang aplikasyon pinaagi sa pagpadala og letter of intent ingon man nag-self assess na.
Ang ikaduhang lakang mao na ang pagdalikyat sa maong mga opisyal ngadto sa BMC aron kiini susihon aron masuta kung duna pa ba’y kulang o wala na, sa ingon matrabaho gilayon kung duna pa’y kulang.
Samtang dungan sa pagdalikyat unya sa maong mga medical experts dinhi sa Butuan, gila-umang bisitahon usab nila ang Caraga Regional Hospital sa Surigao City ug ang Adela Serra Ty Memorial Medical Center sa Tandag City sa Surigao del Sur aron desisyunan na usab ang ilang aplikasyon.
