BUTUAN CITY – Plano karun sa lokal nga kagamhanan sa lungsod sa Buenavista, Agusan del Norte nga mag-isyu ug bag-ong quarantine pass og work pass nga maoy himoong rekisitos adiser makasulod sa merkado publiko.
Sa eksklusibong pakighinabi sa Bombo Radyo Butuan, gipadayag ni Mayor Norbert Pagaspas nga mag-implementar sila og color coding sa mga mupalit aron matuman ang social distancing sulod sa merkado.
Ugaling hingpit na kining ipatuman, dili na pwedeng makasulod ang dili taga-Buenavista nga wala’y work pass isip pamatood nga kini nagtrabaho sa merkado.
Sa kasamtangan, anaa sa 90 porsiento na ang pagpanghatag nila og mga relief goods sa tanang residente sa ilang lungsod.
Samtang nangandam na usab sila sa ikaduhang hugna sa pagtunol ug tabang diin dili moubos sa 20 ka kilos nga bugas ang ihatag sa matag-pamilya.
Gisaad usab ni Mayor Pagaspas nga dunay ikatulong hugna pa sa paghatag ug relief goods aron maseguro nga dili magutman ang katawhan taliwala ning panahon sa pakigbatuk sa virus.
Samtang ugmang adlawa usab sugdan ang himuong household survey isip validation adiser ihatag ang Social Amelioration Program kon SAP gikan sa nasyunal nga kagamhanan.
Sumala pa sa mayor, niadto pang tuig 2016 ang gigamit nga data sa Department of Social Welfare and Development kon DSWD nga layo ra sa data nga ilang gihawiran og na-validate niadtong 2019
