BUTUAN CITY – Giklaro ni PCaptain Gary Gamutan – hepe sa kapulisan sa Socorro, Surigao del Norte nga padayong nangabot sa ilang lungsod ang katawhang gikan sa laing mga lungsod sa nasangpit nga lalawigan ug ubang lalawigan sa Visayas ug Mindanao aron mukuha sa ilang cash gift nga kwartang G-Zion gikan sa gi-apilan nilang Maharlika Nation.
Sa eksklusibong pakighinabi sa Bombo Radyo Butuan, gipadayag ni Captain Gamutan nga ada-adlaw sukad niadtong Enero 2, gibana-banang mukabat sa 800 ka mga tawo ang mudalikyat sa may Sitio Atoyay. sa Isla Bucas Grande aron mukuha sa gisaad kanilang cash gift kondiin ang usa ka G-Zion, nagkantidad og 200-pesos.
Bisan pa man sa gipasi-atab sa grupo nga ang pinakadakong ilang na-imprintang G-Zion mi-abot sa sien-mil kansang kantidad bugti sa 20-milyunes pesos, apan wala gihapon kini girekognisang kwarta kon legal tender sa mga tindahan ilabina sa Bangko Sentral ng Pilipinas kon BSP.
Base sa ilang monitoring, ang uban sa mga midagsa sa maong lungsod gikan sa Marawi City, Lanao del Norte ug Sur, Gingoog City, sa Isabela, Leyte, Agusan del Norte ug Sur ug uban pa.
Sukwahi matud pa sa ubang nagtunhay nga grupo nga duna’y suktong membership fee adiser mag-pay out, sa Maharlika Nation lahi tungod kay boluntaryo kining gihatag sa mga tribo isip cash gift.
Giklaro usab sa opisyal nga wala pa gigamit nga legal tender sa ilang lungsod ang karensiya sa Maharlika Nation nga G-Zion rason nga nanawagan siya sa tanang nagplanong mudalikyat sa Sitio Atoyay nga dili na mudayon pa tungod kay usik lang matud pa kini sa ilang pamasahe og oras unya dili gihapon magamit ang karensiyang ilang gikagubtan.
Kini ilabina nga wala’y grupo sa mga netibo kon indigenous people sa ilang lungsod nga girekognisa sa National Commission on Indigenous People kon NCIP.
Giklaro pa niini nga ang tigpamaba sa Maharlika Nation nga si Glenn Femangco alyas Datu Magsisibya dili taga-Socorro, Surigao del Norte kondili taga-Tacurong, Sultan Kudarat.
