BUTUAN CITY – Padayon pa ang gihimong imbestigasyon sa kapulisan sa Tubod, Surigao del Norte aron matino ang motibo ug ang responsable sa gitu-uhang robbery with homicide nga natigayon ning mi-aging gabii.
Naila ang biktimang si Joysyl Simene Tenebro, 28-anyos, minyo ug residente sa Brgy. Marga sakop sa maong lungsod.
Sa eksklusibong pakighinabi sa Bombo Radyo Butuan, gipadayag ni Police Staff Sergeant Rolly Cabantog, pasado alas-7:40 kagahapon sa buntag dihang mitaho sa ilang buhatan ang usa ka concerned citizen human nakita sa 8-anyos nga anak sa biktima nga nahagba na ang ilang inahan og nagkadugo.
Dihang girespondihan didto nasuta nga duna kini samad-dinunggaban sa iyang lawas ug li-og nga maoy hinungdan sa iyang kamatayon.
Na-ilo sa biktima ang iyang 8-anyos nga anak nga babaye ug 2-anyos nga anak nga lalaki ingon man ang bana niining nagtrabaho sa Mawab, Davao de Oro.
Gika-ingong bag-ong balhin pa sa maong dapit ang biktimang gikan pa sa Surigao City human nga kapuy-an na ang ilang gipatukod nga balay.
Padayon pa usab nga gisuta sa kapulisan kung pila ang kwartang nahanaw gikan sa biktima.
