BUTUAN CITY – Tumang kalisang nga midangop sa municipal police station sa Kitcharao, Agusan del Norte ang duha ka mga medical staff human gi-harass sa gidudahang mga rebeldeng New People’s Army kon NPA human usab ang ilang implementasyon sa ‘Sabayang Patak Kontra Polio’ kagahapon.
Sa eksklusibong interview sa Bombo Radyo Butuan, gipadayag ni PLt. Rico Cusuko – hepe sa Kitcharao MPS, nga gipabuthan sa wala pa masutang eksplosibo dayong pa-ulan og mga bala ang pribadong sakyanan sa municipal pubic health nurse nga si Ingrid Archinue, 46-anyos dihang pauli na unta gikan sa ilang gilusad nga polio vaccination.
Paspas nga gi-maneuver sa nurse ang iyang dark grey nga Innova rason nga ang wind shield lang niini ang na-igo ug wala sila ma-unsa sa ka-uban niyang municipal midwife nga si Jennifer Vertibo, residente sa Brgy. Mahayahay sa susamang lungsod.
Nagtuo matud pa ang mga biktima nga sila ang target sa armadong grupo tungod kay wala man gipabuthan ang uban nilang mga ka-ubanang sakay sa multicab nga anaa lang sa ilang unahan nga ilang gisundan.
