BUTUAN CITY – Tumang kalipay ang gibati sa amahan sa 13-anyos nga si Breanna Labadan human niini gilampaso ang ubang mga contenders ug nasakmit ang Junior Individual All-Around titles sa gi-apilang gymnastic meet sa Slovakia, Hungary, ug Denmark.
Mahinumdumang mihakot og lima ka medalyang bulawan ang duha ka mga teenage Filipina gymnasts nga myembro sa Philippine National Women’s Rhythmic Gymnastics Team sa ilang nahimong away sa tulo ka mga nasud sa Urupa.
Gi-isa ni Breanna Labadan nga taga-Butuan City ang bandila sa Pilipinas human gilampaso ang uban pang representante sa nagkada-iyang nasud sa Junior Individual All-Around titles atol sa maong mga gymnastics meets.
Pinaagi sa makakurat nga mga performances nahakot ni Labadan ang tulo ka mga medalyang bulawan sa gi-apilang Liptov Cup 2019 niadtong Nobyembre 17 sa Liptovsky, Slovakia, 2019 Magic Cup Rhythmic Gymnastics Meet sa Hungary, ug RG Friends Masters Gymnastics Meet sa Denmark.
Sa eksklusibong interview sa Bombo Radyo Butuan, gipadayag ni Arnold Labadan nga nagbunga na gyod ang grabeng sakripisyo sa iyang anak tungod sa halos duha ka tuig niining pagbansay sa Hungary adiser nasakmit ang kalampusan kansa pinaka-una sa kasaysayan sa Philippine National Women’s Rhythmic Gymnastics Team.
Samtang duha ka mga medalyang bulawan usab ang nakamit ni Daniela Reggie Dela Pisa sa Cebu human ang impresibong routines niini sa Senior Individual All-Around titles sa Slovakia ug Hungary.
Nasayrang si Dela Pisa apil sa team sa mga gymnasts sa nasud nga mu-away sa 30th Southeast Asian Games nga himuon sa historic Rizal Memorial Sports Complex samtang si Labadan ay nakatakdang muaway usab sa Estados Unidos ug sa Hungary sa tuig 2020.
Gipadayag usab ni Labadan nga 5-anyos pa lang ang iyang anak dihang ila nang nakita ang talento niini sa gymnastics human nakitang gisundog sa anak ang amga gitan-aw niini sa telebisyon, hinungdan nga mikuha kini og coach ug nagsugod og bansay diin nakasulod sa unang higayon ang anak niini sa palarong pambansa adtong grade-4 pa lang kini ug nahimo kining Top 6 sa kinatibuk-an gymnasts.
Nakadesisyon si Arnold Labadan nga sa Manila ipadayon ang pagtuon sa anak aron mas mapalambo pa ang talento niini sa gymnastics sanglit wala’y saktong pasilidad ang Butuan nga muba-id pa og sakto sa talento niini.
Didto midaog ang anak niini sa ubay-ubay nga mga contests ug nahimo pang MVP sa Palarong Pambansa 2017 hangtud nga nagkampyon sa gymnast competition sa Southeast Asia.
Alayon niini gi-awhag ni Labadan ang mga ginikanan nga suportahan niini ang hilig sa ilang mga anak dayong panawagan sa mga nangatungdanan nga magmugna ug i-develop ang pasilidad sa mga sports aron masuportahan ang talento sa mga lokal athletes aron maba-id pa ang ilang talento sa ingon dili na mapugos ang uban nga manglangyaw pa.
