BUTUAN CITY – Hingpit nang nakagawas gikan sa kapin usa ka buwang pagka-hospital arrest ang kanhi Forex investment scam operator ning siyudad sa Butuan nga si kanhi Nasipit, Agusan del Norte Vice Mayor Ronald ‘Pusoy’ Timogan.
Kini human gi-dismiss na provisionally ang kasong syndicated estafa nga iyang gi-atubang sa sala ni Judge Emmanuel Escatron sa RTC Branch 2, 10th Judicial Region.
Base sa nadawat nga court order sa Butuan City Jail, nakalatid nga atol sa gihimong pagdungog sa motion to dismiss nga giduso ni Timogan pinaagi sa iyang abogadong si Atty. Agustin Tarroza, dapig sa akusado ang gitubag ngadto sa mga clarificatory questions sa mga nag-akusang sila Kenneth Serojihos ug Masriel Kriza Ortua.
Balik-balik pa silang gipangunata sa abogado kung andam silang i-dismiss provisionally ang kasong ilang gipasaka batuk sa akusado nga ila usab nga gi-uyunan.
Dihang mi-uyon usab niini si Timogan, gipirmahan gilayon kini ni Judge Escatron uban sa paghimo niining permanente sulod sa duha ka tuig.
Base sa oral motion ni Atty. Tarroza, gimando gilayon sa korte ngadto sa Butuan City Jail warden ang pagbuhi kang Timogan gawas kung duna kini gi-atubang nga laing kaso.
