BUTUAN CITY – Nag-atubang sa kasong paglapas sa Republic Act No. 10591 o the Comprehensive Firearms and Ammunition Act ang magsoong estudyante human kini nakuhaan og armas ug mga bala atol sa gihimong checkpoint sa National Highway, Purok Dancing Lady, Poblacion, Carmen, Surigao del Sur niadtong Oktobre 27, 2019.
Giila ni Police Regional Office kon PRO-13 Director Brigadier General Joselito T. Esquivel, Jr ang mga suspetsado nga sila Aljorec Iligan, 20-anyos, college student ug iyang igsoon nga si Ariel Iligan, 18-anyos, Grade-12 Student, parehong residente sa Purok-5, Barangay Hinapoyan, Carmen, Surigao del Sur.
Sakay ang mga suspetsado sa kolor pula nga motorcycle nga walay plaka numero sa dihang gipahunong checkpoint mga alas 7:35 sa gabii.
Sa dihang pakyas nga maka-presenta sa driver’s license ug pertinenteng dokumento, nasuta sa otoridad ang nagbukol sa hawak ni Aljorec rasong gihangyu kini nga ipataas ang iyang gisoot nga senina og didto nakita ang kalibre punto 45 nga pistola nga dunay usa ka magazine nga punos sa lima ka buhing bala.
Sa dihang gisakay na ang suspek sa patrol vehicle padulong sa police station, ang iyang kauban nga si Ariel Iligan boluntaryong misakay usab aron ubanan ang iyang igsoon.
Sa pag-abot sa police station, natagak ang usa ka magazine nga puno sa unom ka bala gikan sa hawak ni Ariel sa dihang kini mikanaog sa patrol rasong gi-search ang iyang lawas og narekober ang laing magazine nga dunay karga usab nga unom ka mga buhing bala.
Ang nadakpang mga Suspetsado gikustudiya na sa Carmen Municipal Police Station alang sa tukmang disposasyon.
