BUTUAN CITY – Kampante si PBGen Gilberto DC Cruz – regional director sa Police Regional Office kon PRO-13, nga madugangan pa ang upat ka mga ex-convicts nga nahatagan og kagawasan tungod sa Good Conduct Time Allowance kon GCTA law, nga mitahan na sa managlahing police units dinhi sa Caraga Region.
Kini samtang wala pa matapos ang gihatag nga 15-ka adlaw nga ultimatum ni Pangulong Rodrigo Duterte alang sa libu-ang binilanggong gipa-avail sa maong balaud.
Nasayrang nadugangan og duha ang una nang mitahan nga sila Terencio Funesto, 51-anyos, residente sa Purok 2-B, Brgy. Pigdaulan ning dakbayan sa Butuan kinsa nabilanggo sa Davao Penal Colony human nasentensyahan sa kasong rape ug Adrian Agao, 40 anyos residente sa Brgy. Poblacion, lungsod sa Barobo, Surigao del Sur kinsa nabilanggo sa Cebu City sa kasong paglapas sa Comprehensive Dangerous Drug Act of 2002.
Sa eksklusibong pakighinabi sa Bombo Radyo Butuan, gipadayag ni General Cruz, gihulat na lang nila nga matapos ang gihimong documentation sa maong mga nanurender aron pormal nila kining ma-turn over ngadto sa Bureau of Corrections kon BuCor.
Sayron pa sa opisyal kung pila sa kinatibuk-ang ihap sa mga nahatagan sa GCTA ang taga-Caraga Region aron mas matutukan nila kini og maayo ilabina sa mga hingtungdang police units.
Samtang kampante ang opisyal nga ang uban nag-enjoy una sa ilang na-angkong kagawasan samtang gahulat sa katapusang adlaw sa gihatag nga ultimatum sa pangulo. Posible matud pang mutahan ra sila higayong hapit nang matapos ang deadline sa ultimatum.
