BUTUAN CITY – Gi-inspeksyon na ni Surigao City Mayor Ernesto ‘Estong’ Matugas ang pipila ka mga classrooms sa CV Diez Elementary School nga pila ka adlaw nang gi-abandona.
Gihimo ang pag-abandona aron malikay gikan sa sakit nga dengue ang mga estudyante niini tungod sa stagnant nga tubig sa palibot.
Gimanduan gilayon ni Mayor Matugas ang ilang City Government Services Office (CGSO) nga iprayuridad ang maong problema aron dili masayang ang pundong gigamit alang sa pagpatukod sa bag-ong building ug dili mabutang sa alanganin ang panglawas sa mga bata.
Mahinumdumang nagdeklara og dengue outbreak ang lalawigan sa Surigao del Norte human nga mi-abot sa 1,174 katao ang nataptan sa maong sakit sukad niadtong Enero 1 hangtud Agusto 14 ning tuiga sa 20 ka mga lungsod og sa provincial capital niining Surigao City.
Ang maong siyudad maoy nakatala og pinakadaghang kaso kondiin duha na ang patay sa kinatibuk-ang lalawigan.
