BUTUAN CITY – Gikatakdang magpagawas og official statement ang Department of Health kon DOH- Caraga sa hinungdan sa pagkamatay sa usa ka Grade 3 pupil sa San Isidro Elementary School sa lungsod sa Gigaquit, Surigao del Norte human mi-inom og pangpurgang Albendazole.
Kini human nga gipa-ilalom na sa otopsiya sa mga sakop sa Scene of the Crime Operative kon SOCO–Caraga ang patay’ng lawas sa biktimang si Rheame Ata, 9-anyos.
Sa eksklusibong interview sa Bombo Radyo Butuan, gipadayag ni DOH-Caraga regional director Dr. Jose Llacuna Jr. nga nagpahigayon na og Parents-Teacher Association kon PTA meeting ang maong tunghaan aron personal nga mapa-abot sa mga ginikanan nga ang resulta sa otopsiya ang ilang himuong basehan sa ipagawas nilang statement.
Nasayrang base sa ilang inisyal nga imbestigasyon, pila ka oras lang human mi-inom og pangpurga ang mga bata nga gihatag sa mga health personnel, kalit na lang mireklamo og pagsakit sa iyang tiyan si Ata nga gisundan sa inanay’ng pagkalawa sa iyang panan-aw hangtud nga natumba na kini.
Dali kining gidala sa Gigaquit Municipal Hospital og tungod kay grabe ang kahimtang, gi-refer kini sa provincial hospital og didto na namatay og nasayran pang duna’y laing duha pa ka mga batang na-ospital human usab mi-inom og Albendazole.
Gidugang ni Dr. Llacuna nga Abril 2021 pa ang expiry date sa maong tambal nga gipadala na sa Food and Drugs Administration kon FDA sa Davao City alang sa dugang eksaminasyon.
