BUTUAN CITY – Nagpagawas na og public advisory ang lokal nga kagamhanan ning siyudad sa Butuan ngadto sa publiko aron likayan na ang pag-apil sa Kabus Padatoon kon KAPA Community Ministry International Incorporated og sundon ang gipagawas nga permanenteng cease and desist order kon CDO sa Securities and Exchange Commission kon SEC.
Kini human ang panagtigom sa mga local government officials dihang ilang nadawat ang CDO niadtong Biyernes kansa nag-deputize sa Philippine National Police kon PNP, National Bureau of Investigation kon NBI og local government units kon LGUs aron ipatuman ang maong kamanduan sa ingon hingpit nang mahunong ang pagpangilad sa nagpa-ilang relihiyusong grupo.
Sa eksklusibong pakighinabi sa Bombo Radyo Butuan, gipadayag ni Konsehal Omar Andaya – chairman sa Committee on Trade and Industry sa Sangguniang Panlungsod, laumang sa musunod nga adlaw mahibal-an na ang tukmang aksyong himuon ni Mayor Ronnie Vicente Lagdana human nadawat ang kamanduan apan giklaro niini nga ang kapulisan na ang magpatuman niini kaabag ang uban pang ahensiya sa gobyerno. (Rolan Janea)
