BUTUAN CITY – Siyam ka pulis ang gihukman og silot-kamatayon sa India tungod sa pagkamatay sa usa ka amahan ug anak samtang anaa sa kustodiya sa pulis niadtong tuig 2020.
Sila alyas Jeyaraj, 58-anyos ug ang iyang anak nga si Benicks, 38, parehong namatay sa prisohan sa habagatang estado sa Tamil Nadu — pila ka adlaw human sila gidakop tungod sa gi-ingong pagpadayon sa pag-abli sa ilang tindahan sa cellphone nga supak sa lockdown rules atol sa Covid-19 pandemic.
Gihuboan ang duha ka lalaki ug walay kalooy nga gibunalan atubangan sa usa’g usa, matod sa huwis nga nagpakanao og sentensiya kaganina kansa mihulagway sa kaso isip klarong pag-abuso sa gahom.
Ang mga pulis, nga napamatud-ang sad-an sa pagpatay ning mi-aging bulan, adunay kahigayonan nga mu-apela batok sa ilang sentensiya.
Nasayrang napulo ka pulis sa kinatibuk-an ang gidakop tungod sa brutal nga pagkamatay sa amahan ug anak, apan usa sa mga akusado ang namatay na tungod sa Covid niadtong 2020.
Ang kaso nakapukaw og mga protesta sa Tamil Nadu, uban sa mga magbabalaud sa oposisyon nga ni-apil sa pagmartsa sa kadalanan.
Ang lider sa oposisyon nga si Rahul Gandhi ug ang bituon sa cricket sa India nga si Shikhar Dhawan lakip sa nanawagan og hustisya alang sa duha ka lalaki pinaagi sa social media.
