BUTUAN CITY – Siyam ka mga pulis sa Regional Mobile Force Battalion-10 ang camp restricted human namatay ang ilang ka-ubanan samtang naka-duty sa 2nd Platoon sa 104th Detachment Base nga nakabase sa lungsod sa Kalilangan, Bukidnon.
Base na usab kini sa kamanduang gipakanaog ni Police Regional Office kon PRO-10 Director PBGen. Lawrence Coop aron malimitahan ang ilang paglihok-lihok ug impluwensya samtang nagpadayon ang imbestigasyon sa pagkamatay ni Patrolman Jeffrey Dabuco, 31-anyos, minyo ug residente sa maong rehiyon.
Sigon ni PRO-10 spokesperson PMajor Joan Navarro, human gikatahong missing si Dabuco niadtong Hunyo 24 sa kaadlawon, napalgan ang na-decompose na niining patay’ng lawas sa suba sa Purok 2, Brgy. Panang, lungsod sa Wao, Lanao del Sur kagahapon sa buntag.
Sigon ni Navarro, lakip sa gi-imbestigahan ang gika-ingong pagpanuhol ug pagpalusot nga na-andan na sa maong lugar kondiin nasulti ni Dagupo atubangan sa iyang mga senior officials samtang nag-inom.
Lakip sa gitumbok nga suspetsado sa pagkamatay sa biktima sila Corporal Robert Jun Singcay ug Neil Magriña uban sa laing pito ka mga bagitong pulis nga parehong camp restricted.
