BUTUAN CITY – Mitala og kalampusan ang armadong kusog sa Pilipinas human ang sunod-sunod nga engkuwentro sa bukirang bahin sa Brgy. Bangayan, Kicharao, Agusan del Norte sa nakalabay nga adlaw human nga tulo ka gidudahang Communist NPA Terrorists (CNTs) ang nadakpan, usa ang napatay, usa 9-anyos nga batang lalaki ang na-rescue ug tulo ka high powered firearms ug ubang war materials ang narekober.
Nagpahigayon og combat operations ang tropa sa 29th Infantry “Matatag” Battalion, Philippine Army sa dihang na-engkuwentro ang dili moubos sa 20 ka rebelde nga gitu-uhang miyembro sa Sandatahang Yunit Pampropaganda (SYP) 16A, Guerilla Front Committee 16 sa North Eastern Mindanao Regional Command (NEMRC) ilalom sa pagdumala ni Ka Gab.
Milungtad og 5-minutos ang giyera nga miresulta sa pagkasikop sa tulo ka mga rebelde, ingon man pagka-rescue ang 9-anyos nga bata ug pagkadiskubre sa bag-ong gi-abandona nga hideout nga maka-akomodar sa dili mu-ubos sa 20 ka mga tawo.
Sa gihimong pursuit operations, na-engkuwentro na-usab nila ang gibana-banang lima ka rebelde sulod sa 20 minutos kinsa daling misibat sa nagkalain-laing direksiyun ug nabiyaaan ang usa nila ka kaubanan nga napatay nga gitu-uhang high ranking personality.
Narekober usab ang usa ka M4 rifle nga dunay M203, tag-usa ka battery sa Harris handheld radio, cellphone, Improvised Explosive Device (IED) kit ug backpack nga dunay sulod nga mga subersibong documento.
Sa pagkahapon sa samang adlaw, laing engkuwentro na usab ang natigayon nga milungtad og 15 minutos diin narekober sa tropa sa kagamhanan ang usa ka AK47 rifle ug usa ka AK47 magazine nga puno sa 20 ka buhing bala.
Wala’y natalang casualty sa gobyerno samtang duna’y nasamdan sa mga rebelde base na usab sa mga lama sa dugo nga nakita sa nahitaboan.
