BUTUAN CITY – Midangop ning sibyahan ang usa ka anak aron magpatabang human na-missing ang iyang amahan dihang nanagat niadto pang Miyerkules sa hapon apan wala na maka-uli pa.
Naila ang na-missing nga si Cresencio, 57-anyos, minyo ug residente sa Purok 5, Brgy. Lumbocan ning siyudad.
Sigon sa saysay ni Aileen Tolosa, 30-anyos, sa buntag pa lang nanguha na og pa-on ang iyang amahan kinsa naka-inom og usa ka lapad nga laksoy ug pagka-alas kwatro sa hapon gikuha na matud pa niini ang iyang pumpboat sa dike ug mibiya nga wala man lang mananghid.
Ang ilang gikabalak-an tungod kay napalgan sa mananagat nga taga-Cabadbaran City ang pump boat niini didto sa kadagatang bahin sa may Brgy. Vinapor, Carmen, Agusan del Norte apan wala ang iyang amahan.
Mala-umon si Aileen nga unt napadpad ra kini sa laing lugar ug anaa sa maayong kahimtang.
