BUTUAN CITY- Unom ka tawo patay samtang 20 ang angol human sa usa ka makalilisang nga aksidente nga naglambigit sa usa ka mini dump truck ug pickup truck sa mountain trail road sa Barangay Bolo, Labrador, Pangasinan. Sumala ni PCapt. John Ramos, Officer-in-Charge sa Labrador Municipal Police Station, nga base sa initial nga imbestigasyon, nagsunod matud pa nga nangnaog gikan sa kabukiran ang duha ka sakyanan dihang kalit matud pang nawad-an og preno ang mini dump truck, nga misangit sa pickup truck sa wala pa kini mitagilid ug nahulog sa pangpang.
Sigon pa niini, padayon pa ang imbestigasyon ug wala pa makahatag og pinal nga konklusyon ang kapulisan samtang gisusi usab kung adunay posibleng kaso nga mahimong ipasaka may kalabotan sa insidente. Gikumpirma usab ni Reginaldo Escaño sa Municipal Disaster Risk Reduction and Management Office, nga lakip sa unom nga namatay ang drayber sa mini dump truck, samtang ang mga nasamdan gidala sa lima ka lainlaing ospital alang sa pagtambal.
Samtang mipagawas usab gilayon si Labrador Mayor Noel Uson og Executive Order kansa nagmando sa temporaryong pagpahunong sa operasyon ug pagsulod sa mga empleyado sa solar project site samtang nagpadayon ang imbestigasyon. Gisiguro usab sa mayor nga makadawat og hustong ayuda ang mga pamilya sa mga biktima, samtang nakigkoordinar na ang lokal nga panggamhanan sa kompanya aron masiguro ang gikinahanglang suporta sa mga naapektuhan.
Padayon usab ang site inspection ug koordinasyon sa mga awtoridad alang sa mas lawom nga imbestigasyon sa usa sa labing grabeng aksidente nga natala sa maong lungsod karong tuiga.
