BUTUAN CITY – Kasong illegal possession of illegal drugs kon paglapas sa Section 11 sa Republic Act 9165 ang ipasaka sa Butuan City Police Station2 batuk sa usa ka drug user human ang malampusong pag-serve sa search warrant kaganina.
Nakuha gikan sa posisyon ni Carl Balensona, residente sa Brgy. Pagatpatan ning siyudad ang lima ka dagkong sachet nga duna’y sulod nga pina-ugang liso sa marijuana.
Sigon ni BCPS-2 station commander Captain Joel Amado, wala’y lain nilang nakuha gikan sa posisyon sa suspek kondili ang marijuana lang kansa mao matud pa’y na-andan niining gamiton.
Dugay na matud pa kining gipahimangnuan uban sa paglaum nga magbag-o na ilabina nga nagtungha pa kini sa kursong nautical isip pagsunod sa lakang sa iyang amahan nga usa ka seaman apan padayon gihapon sa iyang bisyo rason sa gilusad nga operasyon.
Alayon niini, nanawagan si Brgy. Konsehal Romeo Pizarro, chairman sa Committee on Peace and Order sa Sangguniang Barangay ngadto sa tanang kabatan-unan sa ilang lugar nga nagumon pa gihapon sa paggamit o kaha pagpayuhot niini, nga undanong na kini tungod kay wala kini mahatag nga kaayuhan sa ilang kaugalingon ilabina sa ilang kaugmaon.
