BUTUAN CITY- Ming-abot na sa 5.15 milyon ka populasyon sa nasud ang apektado sa hini-usang epekto sa mga miaging bagyong Maymay ug Luis ug habagat, base sa taho sa Office of the Civil Defense (OCD) karung adlawa Martes, Agosto 18.
Bugti kini sa dul-an 1.47 milyon ka pamilyang gibaha gikan sa Ilocos Region, Cagayan Valley, Central Luzon, Bicol Region, Western Visayas, Zamboanga Peninsula, Calabarzon, Mimaropa, Cordillera Region ug National Capital Region.
Sumala ni OCD information officer Diego Mariano, nagpabilin gihapon sa mga evacuation center ang kapin 6,300 ka pamilya.
Padayon usab nga giberipika ang 27 ka indibidwal nga gitahong namatay samga kataladman. Natala ang 15 sa mga biktima sa Benguet, samtang sa Rizal ug Batangas adunay tig-tulo ang patay, duha sa Caloocan ug tag-usa sa La Union, Quezon ug Negros Occidental.
Sa pagkakaron, aduna pay usa ka indibidwal ang gitahong missing.
Gibana-bana usab nga 1,786 ka mga panimalay ang nadaot kung asa 203 niini naguba.
