BUTUAN CITY – Ang palpak nga estratihiyang gigamit sa Estados Unidos sa pag-atake sa Iran ka-uban ang Israel ang nakitang rason ni Professor Gerry Caño, presidente sa Philippine Criminology Association of the Philippines kon PCAP nga naghatag kini og 48-oras nga ultimatum ngadto sa Iran aron ablihan na ang Strait of Hormuz.
Sa eksklusibong pakighinabi sa Bombo Radyo Butuan, gipadayag ni Caño nga ang una niyang nakitang rason sa pag-atake sa Amerika ug Israel sa Iran, mao ang fund-raising aron ma-revive kon mabalik ang ekonomiya sa Amerika ilabina nga duna’y himuong eleksyon sa maong nasud karong tuiga.
Tumong matud pa ni Trump nga mapakusgan ang dagan sa ekonomiya sa ilang nasud tungod sa nagkadaut nga kondisyon niini.
Kini gawas usab sa pagparalisa matud pa sa China ug Russia sa ingon dili na mulambo ang ilang ekonomikanhong kalihukan.
Dugang sa criminology professor, imposibleng himuon ni Trump ang iyang bahad tungod kay mahimong muresulta matud pa kini sa economic meltdown dili lang sa Amerika kondili apil na sa tibuok kalibutan.
Kini tungod na usab kamatu-uran nga dili lang mga produktong lana ang nag-agi-an sa Strait of Hormuz kondili apil na ang mga farm ug agricultural products.
Dugang pa ni Caño, dili angayang kalimtan sa Amerika nga ang Iran, battle-tested na nga nasud tungod kay niadto pang dekada 70 kini nalambigit sa mga giyera ug hangtud karon, napamatud-an matud pa niini ang ilang survival.
Nagtuo si Caño nga ang gihimo sa Amerika ug Israel ngadto sa Iran, magpasamot na hinuon pagka-ut-ot sa daan nang na-ut-ot nga ekonomikanhong kahimtang sa tibuok kalibutan. Gani ang bahad usab sa Iran nga hingpit nga isira ang Strait of Hormuz higayong dili nila sundon ang ultimatum ni Trump, nagpakita lang nga dugay nang andam ang Iran sa giyera batuk sa Amerika.
