BUTUAN CITY – Upat ang natalang patay samtang laing walo ang angol ug nadala na sa Butuan Medical Center kon BMC human nahulog ang iyang gisakyang pribadong Toyota Hi-Ace van sa pangpangnga bahin sa Purok 2, Brgy. De oro ning siyudad sa Butuan kaganinang alas-siete sa buntag.
Naila ang mga namatay nga sila Roderick Lamigo, Harold Bitangcol, Michael Abaab ug Luther Deguito, pulos residente sa lungsod sa Cagwait, Surigao del Sur.
Sa eksklusibong interview sa Bombo Radyo Butuan ngadto sa usa sa mga pasaherong si Pastor Semanes Jr., gibutyag niining duha sila ka sakyanan nga nag-convoy nga parehong mga empleyado sa lokal nga kagamhanan sa ilang lungsod.
Mibiya matud pa sila kaganinang alas-singko sa sayong buntag gikan sa Brgy. Arasa-asan aron mukuha og mga kinahanglanong papeles sa National Bureau of Investigation kon NBI ug sa Philippine Statistics Authority kon PSA dinhi sa Butuan.
Ang ilang ubang mga ka-uban, sakay sa nag-unang sakyanan sa LGU ug silang 12 ka buok sakay sa van kondiin pag-abot sa kurbadahong bahin sa nasangpit nga barangay, wala namakontrola sa driver ang manibela sa ilang sakyanan rason nga midiretso na kini og bangga sa barandilya lahos na ngadto sa habog nga pangpang hinungdan sa pagkahulog niini sa suba.
Samtang gibutyag usab sa usa ka ginang nga residente sa Purok 2,Brgy. De Oro, nga disgrasyahanan gyod ang maong lugar ug kamatu-uran niini, kanunay na silang maka-rescue og mga motorsklo nga matagak sa maong pangpang.
Gipadayag usab niining taud-taud pa adiser naka-abot ang mga rescuers ug nasaka ang mga biktima tungod sa kahabog sa pangpang.
