BUTUAN CITY – Simultaneous nga nahatagan og 15-mil pisos nga emergency relief subsidy sa Department of Social Welfare and Development kon DSWD ang 38 ka mga micro rice retailers sa Caraga Region ning adlawa.
Gilangkuban kini sa lima ka mga rice retailers sa Agusan del Norte nga parehong taga-Butuan City; 15 sa San Francisco sa Agusan del Sur; 12 sa Surigao City sa Surigao del Norte ug 6 sa Tandag City sa Surigao del Sur.
Sa eksklusibong pakighinabi ning sibyahan, gibutyag ni Clea Mariel Camba, ang provincial development officer sa Sustainable Livelihood Program kon SLP sa ahensya, sila ang naghatag sa pundo nga gipa-agi usab sa Department of Trade and Industry nga maoy nagrekomenda sa mga angayang hatagan niini. Sa unang batch sa mga benepisyaryo sa programa, aminado ang opisyal nga duna’y pipila ka mga concerns silang giresolba aron masunod ang patakaran nga angayang sundon adiser madawat ang ayuda.
Samtang dako ang pagpasalamat sa rice retailer nga si Merciditha Sonora sa ayudang iyang nadawat tungod kay wala man niya kini gila-uman. Dako na matud pa og ikatabang kanila ang 15-mil pisos aron makabawi-bawi sila sa ilang gasto dungan sa panghinaut nga unta ilibkas na ang pagpatuman sa price cap.
