BUTUAN CITY- Gisugat ang unang adlaw ingon man opening sa klasse sa 2026-2027 nga school year og kusog nga linog ang rehiyon. Sumala ni Pedro Tecson, tigapamaba sa Department of Education kon DepEd-Caraga, nga ang unang adlaw sa klase karong tuiga gisugat dayon og linog hinungdan nga napugos ang lokal nga panggamhanan sa pagsuspende sa klase sa daghang lugar sama sa Agusan del Sur, Butuan City, Bayugan City ug ubang bahin sa Caraga, samtang sa Bislig City wala’y suspensyon ug nagpadayon ang klase, gani dugang pa niini nga bisan pa sa maong panghitabo, malinawon ug malampuson sa kinatibuk-an ang pag-abli sa klase.
Base sa monitoring sa DepEd, kapin 1,700 ka eskwelahan ang nasuta ug 31 ka classrooms sa Agusan del Norte, Bayugan ug Cabadbaran ang nakasinati og minor damage. Gipasiugda usab ni Tecson, nga nagpadayon ang assessment ug monitoring sa ahensya aron masuta ang kahimtang ug angay nga aksyon. Samtang ang Provincial Government sa Agusan del Sur ug Butuan City nag-isyu na og opisyal nga suspensyon sa klase.
Sigon pa ni Tecson, nga dako ang nahimong tabang sa regular nga pag-implementar sa earthquake drills ug ubang disaster preparedness protocols matag quarter, tungod nahimong andam ug adunay kahibalo ang kadaghanan sa mga eskwelahan ug empleyado sa hustong pagresponde panahon sa emerhensiya. Sa kasamtangan, wala pa’y nakitang dako nga kadaot sa regional office ug nagpadayon ang pagmonitor sa tanang division ug skwelahan aron masiguro nga hapsay ug luwas ang pagpadayon sa klase sa rehiyon
