BUTUAN CITY – Gi-andam na ang kasong ipasaka batuk sa 3 ka suspetsadong nadakpan atol sa gikasang buybust operation kaganinang hapon sa alas 5:00 sa hapon sa may Purok-2, Barangay Villa Kananga ning siyudad sa Butuan.
Gikasa ang operasyon sa mga ginsakpan sa City Drug Enforcement Unit og sa Butuan City Police Station-1.
Naila ang subject sa maong operasyon nga si Chara Mae Agipo, 28-anyos, dunay kapuyo nga taga Purok-4, Barangay Ampayon ning siyudad. Nakuha sa iyang posisyon ang 7-mil ka pesos nga buybust money lakip na ang buybust item niini og laing 2 ka sachet nga dunay sulod sa gitoohang shabu.
Lakip sa nadakpan si Rustom John Colon, 27-anyos, olitawo nga silingan sa ni Agipo. Nakuhaan usab kini og 3 ka mga sachet nga dunay sulod sa gitoohang shabu.
Samtang gisikop usab og apil ang tag-iya sa balay diin sila nadakpan nga si Arcillo Diaz alyas Boyet, 50-anyos og olitawo diin nakuhaan usab og 2 ka sachet sa susamang epektus.
Nasayran nga mogamit na unta ang mga suspek sa dihang gihimo ang operasyon. Gane lakip sa nakumpiska ang 1 ka rolyo sa aluminum foil gawas sa mga aluminum foil nga gilukot na, 5 ka lighter og gunting.
Sa katibuk-an gibana-banang muabot sa 21 gramos ang nakuhang gitoohang shabu nga mokantidad sa 142-mil 800 pesos.
Sa eksklusibong pakighinabi ning sibyahan sa suspek nga si alyas Boyet, gi-angkon niini nga mogamit siya og shabu apan gipamugos nga wala siya misulod sa pagpamaligya niini. Sumala pa ni Alyas Boyet nga dili siya makabalibad sa higayong dunay muanha sa iyang balay.
