BUTUAN CITY – Gipasakaan na og kasong paglapas sa Republic Act 9484 kon mas nailang Philippine Dental Act of 2007 ang nadakpang tulo ka mga peke nga dentista sa may Brgy. Libertad, ning siyudad sa Butuan human sa gilusad nga Oplan OLEA sa Criminal Investigation and Detection Group kon CIDG-Regional Field Unit 13.
Naila ang mga nadakpan nga sila Norjana Abdul, 27-anyos, minyo, residente sa RHXI Federville Subdivision sa Cotabato City; Mohammad Bajunaid, 24-anyos, minyo, residente sa Brgy. Bagua 1, Cotabato City ug Marlon Sugetarios, 24-anyos, ulitawo ug residente sa Purok 6, Brgy. San Miguel, Tagum City, Davao Del Norte.
Ang mga operatiba sa CIDG Regional Special Operating Team kon RSOT uban sa Philippine Dental Association-Agusan del Norte ug sa Butuan City Police Station kon BCPS-3, naglusad og entrapment operation batuk sa illegal practice sa dentistry hinungdan sa pagkasikop sa mga responsable.
Usa sa mga CIDG operatives ang nagsilbing poseur-client ug maoy nakig-transact sa usa sa mga suspek alang sa braces adjustment kondiin nagkasabot silang magkita sa Robinsons mall rason nga gisundo pa sa suspek ang poseur-client ug gidala ngadto sa Northtown VCDU sudivision.
Dinhi na nangayo og 500-pisos ang suspek isip registration fee ug gisugdan gilayon ang dental operation ug dinhi na sila gisulod sa operating team uban sa mga saksi.
Dihang wala’y napakitang mga dokumento ang mga suspetsado alang sa ilang dentistry practice dinhi na sila gidakop ug gikumpiska ang balor sa 50-mil pisos nila nga mga dental instruments nga maoy gamitong ebidensya apil na ang kolor itom nga Mitsubishi Montero Sport Color nga balor 1.5-milyunes pisos.
