BUTUAN CITY – Dakong garbo na usab alang sa dakbayan sa Butuan ang hatud sa tulo ka mga Butuanon swimmers nga parehong sakop sa Georgetown swimming team-Butuan human nakakuha og mga bronze medals sa ilang gi-apilang 2022 Finis Short Course Swim Competition National Finals nga gipahigayon sa New Clark City, Aqua Center sa Capas, Tarlac.
Apil niini si Denise Angela Bacala, alang sa 100-meter breaststroke; Kate Lea Marie Durens, alang sa 100-meter butterfly ug Franco Luis Dueñas nga nakakuha og duha ka bronze medals alang sa 50-meters free style ug laing usa ka bronze alang sa 50-meter butterfly.
Sa eksklusibong pakighinabi sa Bombo Radyo Butuan, gipadayag ni Mary Angelique Bacala, inahan sa swimmer nga si Denise Angela Bacala, team effort ang ilang nakab-ot sa swimming event ilabina nga taud-taud na silang wala maka-apil sa kompetisyon tungod sa COVID-19 ug nakabalik lang human nga fully vaccinated na silang tanan sa koponan ilabina ang mga swimmers.
Gani iyang gibutyag nga nag-hire pa sila og bag-ong coach nga taga-Tagum City nga maoy mi-train sa mga bata kansa napamatud-an nilang usa ka malampusong lakang.
Tungod sa maong kalampusan , laing kompetisyon na usab ang ilang pangandaman nga himuon sa Bohol karong Disyembre.
.
