BUTUAN CITY – Nagdeklara og tulo ka adlaw nga holiday ang kagamhanan sa Japan subay sa pagbukas na sa 2020 Tokyo Olympics ugma sa alas-siete sa gabii.
Sa eksklusibong pakighinabi sa Bombo Radyo Butuan ngadto kang Bombo Samurai international correspondent Reuben Cabaluna Jr. direkta gikan sa Tokyo, gibutyag niining nagsugod ang holiday karong adlawa, apil na ugma sa pagbukas ingon man sa pagsira na sa olimpyada kondiin ang mga holidays ning buwan sa Hulyo ug sa Agusto, gibira sa kagamhanan aron matapal sa tulo ka mga Olympic holidays.
Gipasabot sa Butuanong si Cabaluna, tumong niini nga wala’y tawong maglaag-laag atol sa duration sa olimpyada tungod kay wala’y gitugutang audience sa tanang events nga himuon rason nga pulos lang mga atleta uban sa ilang coaches ang makasulod sa mga game venues.
Kagahapon, halos siento-porsiento na sa mga atleta gikan sa nagkada-iyang nasud sa kalibutan ang nangabot na sa ilang athlete’s village samtang karong adlawa usab gikatakdang mangabot ang mga dignitaries aron makatambong na sa opening ceremony ugma sa gabii.
Samtang aron masigurong wala’y mataptan og COVID-19 atol sa duration sa olimpyada, istriktong ipatuman sa mga organizers ang gihan-ay nga health protocols apil na niini ang pag-require sa mga magdudula pag-adto sa venue unom ka oras adiser ang ilang apilang event, aron i-swab test silang daan.
Giklaro ni Cabaluna nga ang mga atletang dili maka-abot og unom ka oras adiser ang ilang event, dili makadula.
