BUTUAN CITY – Patay ang duha ka managsoon samtang laing usa ang naluwas human nalumos atol sa pagpangaligo og dagat sa ilang pamilya didto sa Brgy. Dahican, lungsod sa Magallanes, Agusan del Norte kagahapon sa ala-1:40 sa hapon.
Patay nang nahidangat sa ospital sa maong lungsod sila Jericho Bagayas, 10-anyos ug Jim Carlo, 18-anyos samtang naluwas usab ang 12-anyos nga si Japer, pulos residente sa Purok 6, Brgy. Baan ning siyudad sa Butuan.
Sigon ni Police Staff Sergeant Imam, natunong matud pa sa kumunoy nga bahin ang managsoon atol sa ilang pagkaligo rason nga wala gilayon sila nakahaw-as resulta sa maong hitabo.
Samtang padayon pang gipanubayan ang na-missing nga bata human nga naluwas ang duha niini ka mga ka-ubanan dihang na-anod sila sa kusog nga sug samtang naligo sa Agusan River kagahapon sa alas-dose sa udto sa may Purok-1, Barangay Mandamo ning siyudad sa Butuan.
Sa pakighinabi sa Bombo Radyo Butuan kang Police Lt. Angelo Gestano sa Butuan City Police Station kon BCPS-5, gibutyag niining daling gitabang sa mga tawo ang duha nga naluwas kinsa padayon pang nag-recover sa ilang maayong panglawas sa balay tambalanan.
