BUTUAN CITY – Nakatala na usab og 53 ka mga bag-ong kaso ang Caraga Region ug duha ang patay kondiin sa mga bag-ong kaso, 29 niini ang mga babaye samtang 24 usab ang mga lalaki ug 57-porsiento sa maong ihap anaa sa edad nga 21 hangtud 50-anyos.
Sa virtual presser sa Department of Health kon DOH-Caraga, nasayran nga sa maong mga kaso, nakatala ang Agusan del Norte ug lima ka mga kaso partikular sa lungsod sa Tubay nga duna’y 2 ug tag-usa na dayon sa Kitcharao, Nasipit ug RTR; usa ka kaso sa Brgy. Tolosa sa Cabadbaran City; 13 ka mga kaso usab ang natala sa Agusan del Sur nga gi-apod sa lungsod sa San Francisco nga duna’y 6 samtang 5 sa Bunawan ug tag-usa sa Rosario ug Talacogon.
Nakatala usab og 13 ka mga kaso ang Surigao del Norte nga nabahin sa lungsod sa Placer-9; Dapa-2 ug tag-usa sa Claver ug Tubod samtang duha ka mga kaso ang natala sa Surigao City nga nakatala og tag-usa sa Brgy. Balibayon ug San Juan.
Nakatala usab og tag-usa ka kaso ang mga lungsod sa Tagbina ug Cantilan sa Surigao del Sur samtang pinakadaghan ang dakbayan sa Butuan nga mi-abot sa 17 kansa natala sa Brgy. Baan Km. 3 nga mi-abot sa 4, tag-tulo usab sa Brgy. Ambago ug Libertad, 2 sa Villa Kananga ug tag-usa na sa Brgy. Agusan Pequeño, Dagohoy, JP Rizal, Lapu-Lapu ug Tiniwisan.
Sa mga bag-ong kaso, 33 ang wala’y mga simtomas, 17 ang mild, duha ang severe ug usa ang kritikal.
Apil sa mga namatay ang usa ka 60-anyos nga lalaking taga-Dapa, Surigao del Norte kinsa hypertensive ug duna’y heart failure ug nakasinati og balik-balik nga ubo niadtong Nobyembre 8 ug gidala sa ospital pagka-Nobyembre 14 apan namatay paglabay sa pipila ka oras.
Ang ikaduhang namatay mao ang 73-anyos nga babayeng taga-Cantilan, Surigao del Sur, kinsa hypertensive, ug duna’y heart ug gastro-intestinal problem. Na-admit kini niadtong Nobyembre 14 tungod sa paglisod og ginhawa apan namatay pagkasunod adlaw.
Tungod niini, ang Caraga Region nakatala na og 3,403 ka cumulative COVID-19 cases kondiin 457 niini ang mga aktibong kaso, 2,783 ang mga nakarekober ug 163 na ang kinatibuk-ang patay.
