2-anyos na bata, kritikal human nasunog sa gikab-ot nga lampara nga anaa sa altar
BUTUAN CITY – Kritikal ang kahimtang sa usa ka 2 anyus nga batang babaye nga midilaab alas 7:00 ang takna kagabie sa dihang nahagbongan ug lampara nga ilang gigamit isip muhatag ug kalamdag sa ilang panimalay.
Naila ang biktima nga si April Jane Baylan taga Purok 4 Barangay Ambago ning syudad kansa anaa pa karon sa may Agusan Del Norte Provincial Hospital kay nakahiagum ug sunog sa nagkadaiyang parte sa iyang kalawasan.
Sumala pa ni Elton Baylan amahan sa biktima nga duna siyay gibuhat sa kusina ug wala mabantaye nga gikab-ot na sa iyang anak ang lampara nga anaa gibutang sa altar. Gikatingala nalang niini nga milamdag na ang ilang balay ug sa iyang paglingi midilaab naman ang iyang anak.
Gipaningkamutan niini nga mapalong ang kalayo pinaage sa paggamit ug panapton ug pagsabya ug tubig sa lawas sa iyang bata.
